2025 жылғы 4 сәуір күні Орталық коммуникациялар қызметінде өткен баспасөз мәслихатында ҚР Ішкі істер министрлігі Әкімшілік полиция комитетінің төрағасы Қайсар Сұлтанбаев мопедтерді тіркеу бойынша халық арасында туындаған ажиотажға түсініктеме берді.
Оның айтуынша, мопедтерді тіркеуге ешқандай мерзімдік шектеу қойылмаған. Алайда 5 сәуірден бастап тіркелмеген мопедтерді пайдалануға тыйым салынады. Тиісінше, бұл күннен кейін де мопедтерді тіркеу мүмкіндігі сақталады.
«Тіркеуді кез келген уақытта жасауға болады, бірақ 5 сәуірден кейін тіркелмеген мопедті жолға шығаруға болмайды. Бұл талап жол қозғалысы қауіпсіздігін қамтамасыз ету мақсатында енгізіліп отыр», – деді Қайсар Сұлтанбаев.
Бүгін, 4 сәуірде, Алматы қаласындағы Саялы ықшам ауданындағы автоЦОН алдында жүздеген мопед пен тіркеу кезегінде тұрған адамдардың ұзын-сонар легі байқалды.
Еске сала кетейік, мопед жүргізушілеріне 5 сәуірден бастап тіркеусіз көлік құралын басқарғаны үшін әкімшілік жауапкершілік қарастырылған.