Су тасқынынан зардап шеккен отбасыларға арнайы салынған және сатып алынған үйлер мен пәтерлер берілді
Қазақстан үкіметі су тасқынынан зардап шеккен отбасыларға тұрғын үй салу және сатып алу, сондай-ақ оларға жан-жақты көмек көрсету бойынша өңірлерде жүргізіліп жатқан жұмыстарды тұрақты бақылауда ұстап отыр, деп хабарлайды aqshamnews.kz
Қираған баспанасының орнына 4769 отбасы жаңа үй мен пәтерлерге ие болды. Сонымен қатар зардап шеккен өңірлерде 2568 жаңа үйдің құрылысы қарқынды түрде жүргізіліп жатыр, оның ішінде 470 нысан бойынша жұмыстар толығымен аяқталып, тұрғындарға кілттер табысталды. Бұл аймақтар бойынша мәліметтер:
- Солтүстік Қазақстан облысында – 285 үй
- Қостанай облысында – 57 үй
- Батыс Қазақстан облысында – 80 үй
- Ақтөбе облысында – 43 үй
- Павлодар облысында – 5 үй
Барлық облыста су басқан тұрғын үйлерді тексеру және бағалау жұмыстары 100% аяқталды. Жалпы сомасы 49,3 млрд теңгеге 8 853 отбасы тұрғын үйді жөндеуге және қалпына келтіруге тиісті төлем алды.
34 216 отбасыға 12,6 млрд теңгеге 100 АЕК мөлшерінде біржолғы өтемақы төленді. Сондай-ақ жоғалған бірінші қажеттіліктегі заттарын сатып алу үшін 150 АЕК-ке дейін қосымша төлемдер берілуде. Бүгінгі таңда 9,9 млрд теңгеге 21 869 отбасы осындай көмек алды.
Зардап шеккен бизнеске келтірілген залалды өтеу жұмыстары жалғасуда. Өңірлік комиссиялар жалпы сомасы 7,9 млрд теңгеге ШОБ субъектілерінің 455 өтінімін қарап, мақұлдады.
Суға кеткен мал үшін берілген мемлекеттік көмек көлемі 2,8 млрд теңгеден асты.
Бұл жұмыстар тұрғындардың жағдайын жақсарту және су тасқынынан зардап шеккен аймақтарды қалпына келтіру мақсатында жүзеге асырылуда.