Бағдарлама аясында білім беру және денсаулық сақтау мекемелерінде қол жууға арналған орындар санитарлық-гигиеналық жабдықтармен толық қамтамасыз етіледі.
2025 жылы Өзбекстанда халықтың санитарлық жағдайын жақсартуға бағытталған ауқымды шаралар қолға алынып отыр. Президент Шавкат Мирзиеевтің бастамасымен елде «Таза қол» атты арнайы бағдарлама жүзеге асырылады, деп хабарлайды aqshamnews.kz
upl.uz-тің мәліметінше, бұл жобаға 780 миллиард сум (шамамен 64 миллион доллар) көлемінде қаржы бөлінеді.
Бағдарлама аясында білім беру және денсаулық сақтау мекемелерінде қол жууға арналған орындар санитарлық-гигиеналық жабдықтармен толық қамтамасыз етіледі. Сондай-ақ санитарлық инфрақұрылымды жаңғыртуға басымдық берілмек.
Атап айтқанда, 126 мектепте оқушыларға қолайлы жағдай жасау үшін ішкі дәретханалар салынады. 6 мыңға жуық балабақшаға күн энергиясынан қуат алатын коллекторлар орнатылады. Ал 4300 әлеуметтік нысанға үздіксіз ауызсу жеткізу мақсатында су сақтайтын резервуарлар қойылады.
«Таза қол» бағдарламасының тағы бір маңызды бағыты — тұрғындардың жеке гигиена талаптарын сақтау маңыздылығы жөнінде ақпараттандыру жұмыстары. Дәрігер мамандардың айтуынша, қарапайым гигиеналық ережелерді сақтау арқылы жұқпалы аурулардың 35–40 пайызын алдын алуға болады.
Бұл бастама Өзбекстанда қоғамдық денсаулықты нығайтуға және өскелең ұрпаққа тазалық мәдениетін үйретуге бағытталған маңызды қадам болмақ.