Дауысты 2GIS мобильді қосымшасында навигатор баптауларына өтіп таңдауға болады.
2GIS бағытты қазақшаға дауыстайтын функция қосты. Оны мобильді қосымшаның баптауынан қосуға болады. Бұл туралы Almaty-akshamy.kz Dropbox.kz-ке сілтеме жасай отырып хабарлайды.
2GIS биыл сәуір айында геосервистер арасында бірінші болып қазақ тіліне аударылған картаны және ұйымдарды іздеуді іске қосты. Енді қосымшаға қазақша дауыстар қосылды.
«2GIS-тің алғашқы қазақ дауыстары кәсіби алматылық дикторлар Бибігүл Керімова мен Ерланби Даулетияр болды. Олар ең келісті интонациялар мен тіпті әдеттегіден «жанды» сөйлеу стиліндегі фразалар нұсқасын ұсынды. Әдеттегідей, біздің навигаторымыздың сөздері әдемі, қысқа да нұсқа, тым кітап тіліндей емес, табиғи қазақ тіліне жақынырақ болғанын қалаймыз», — деді 2GIS продюсері және редакторы Роман Жайворон.
Оның айтуынша, қазақша дауыстық бағыттауды кез келген маршрут кезіндеқосуға болады. Дауысты 2GIS мобильді қосымшасында навигатор баптауларын басып таңдауға болады.
Айта кетейік, сәуір айынан бастап 2GIS-те қазақ тіліне аударылған карталар және ұйымдарды іздеуге болады. Енді сервисте дүкендерді, дәріханаларды, қоғамдық тамақтану орындарын, мәдени мекемелерді, көрікті жерлерді және басқа да орындарды қазақша іздеуге болады.
Бұл ретте қосымшада таңдалған тіл мен навигатордың даусы бір-біріне тәуелді емес. Мысалы, қосымшада жалпы орыс тілі таңдалса да, дауыстық кеңестерді қазақ тілінде қосуға болады.