Биылғы 25 тамыздан бастап Қазақстанда жүргізушілерге қатысты бірқатар жаңа талап күшіне енеді, – деп хабарлайды aqshamnews.kz тілшісі Ішкі істер министрлігіне сілтеме жасап.
Ең маңызды өзгерістердің бірі – 65 жастан асқан жүргізушілер мен мүгедектігі бар азаматтар енді екі жылда бір рет міндетті медициналық тексеруден өтуге тиіс.
Министрліктің мәліметінше, медициналық тексеруден өткені туралы ақпарат Денсаулық сақтау және Ішкі істер министрліктерінің ақпараттық жүйелері арқылы автоматты түрде тексеріледі. Егер жүргізушінің тексеруден өткені немесе көлік басқаруға қарсы көрсетілімі жоқ екені расталмаса, оның көлік құралын басқару құқығы уақытша тоқтатылады. Бұл талап тек 65 жастан асқан және мүгедектігі бар жүргізушілерге ғана қатысты.
Сонымен қатар жол қозғалысы ережесін өрескел бұзған жүргізушілерге қатысты жаңа тәртіп енгізіледі. Заңда көрсетілген жағдайларда олар қайтадан теориялық емтихан тапсыруға міндеттелуі мүмкін. Бұған жол қиылысында апаттық жағдай туғызу, жылдамдықты бірнеше рет асыру, қауіпті маневр жасау, жолақ ауыстыру немесе басып озу ережелерін өрескел бұзу сияқты құқық бұзушылықтар жатады.
Егер жүргізуші дәлелді себепсіз тиісті қаулыны алған күннен бастап екі ай ішінде теориялық емтиханға келмесе, оның көлік жүргізу құқығы да тоқтатылады.
Бұдан бөлек, мас күйінде көлік басқарғандарға қатысты жауапкершілік күшейтілді. Енді алкогольдік, есірткілік немесе уытқұмарлық масаң күйде көлік жүргізген адамға қатысты қылмыстық іс жәбірленушімен татуласуына байланысты тоқтатылса да, ол 8 жылға көлік жүргізу құқығынан айырылады. Ал жүргізуші куәлігі жоқ азаматтар осы мерзім ішінде оны ала алмайды.
ІІМ аталған өзгерістердің барлығы жол қозғалысы қауіпсіздігін күшейтіп, азаматтардың өмірі мен денсаулығын қорғауға бағытталғанын атап өтті. Ведомство жүргізушілерді жол қозғалысы ережелерін қатаң сақтауға, ал міндетті медициналық тексеруге жататын азаматтарды оны уақытылы өтуге шақырды.