«Қазгидромет» синоптиктерінің мәліметі бойынша, қараша айының екінші жартысында еліміздің бірнеше өңірінде ауа температурасы −24 градусқа дейін төмендеуі мүмкін, деп хабарлайды aqshamnews.kz.
Алдағы күндері Қазақстанның көп бөлігінде жауын-шашын күтілуде. Оңтүстікте қар аралас жаңбыр, ал солтүстік және батыс өңірлерде қар мен боран болатыны болжанып отыр. Елдің басым аумағында жел күшейеді.
Қараша айының ортасынан бастап елімізге антициклон әсер етеді. Суық ауа массаларының енуі нәтижесінде республиканың солтүстік, орталық және шығыс аймақтарында термометр көрсеткіштері −15–24 градусқа дейін төмендеуі мүмкін. Ал батыс және оңтүстік аймақтарда температура −3–15 градус аралығында болады.
Алайда, аяздан кейін синоптиктердің болжамына сәйкес, Қазақстанда күн күрт жылынады деп күтілуде. Оңтүстік-Шығыс Азия мен Жерорта теңізінен келген ауа массалары елдің көп бөлігінде температураның +3–8 градусқа дейін көтерілуіне себеп болады. Оңтүстікте температура +15 градусқа дейін жылынуы мүмкін.