Алматы қаласын дамыту бағдарламасы автобус паркін жаңарту мен оны экологиялық таза етуді ескере отырып, қоғамдық көлікті дамытуға басымдық береді.
Бұл туралы Алматы қаласының әкімі Е.Досаев Үкіметтің кеңейтілген отырысында айтты, деп хабарлайды Almaty-akshamy.kz.
«Биыл екі метро станциясы іске қосылды, 550 жаңа автобус пен троллейбус сатып алынды (парк 22,5%-ға жаңартылды), 2 магистралды көше ұзартылды, 25 км жаңа жол салынды, 200 км жолға орташа жөндеу жүргізілді.
2023 жылы көлік инфрақұрылымын дамыту шеңберінде газбен жүретін 300 жаңа автобус пен 100 троллейбус сатып алынады, 80 аялдама орнатылады», - деді Алматы әкімі Е.Досаев.
200 км жолға орташа жөндеу жүргізіліп, 30 км тротуар салынады, 2 көлік жолайрығы (Бұқтырма – Құлжа күре жолы, Саин-Мөңке би көшесі) аяқталады.
Нәтижесінде, жылдың соңына қарай жақсы және қанағаттанарлық жағдайдағы жолдардың үлесі 89%-ке жетеді.
Қала аудандары арасындағы байланысты қамтамасыз ету үшін Алматы агломерациясын дамытуды ескере отырып, 2040 жылға дейін Алматы қаласының көлік каркасын дамытудың шеберлік жоспары әзірленетін болады.