Қазақстанның туристік аймақтарында мобильді байланыс пен интернетпен қамту кеңейтілуде
Мемлекет басшысының тапсырмасын орындау аясында еліміздің үш негізгі туристік өңірінде цифрлық инфрақұрылымды дамыту бойынша кешенді жұмыс жүргізілуде.
Бұл туралы Үкімет отырысында цифрлық даму, инновациялар және аэроғарыш өнеркәсібі министрі Жаслан Мәдиев мәлімдеді, деп хабарлайды aqshamnews.kz.
Аталған шаралар ұялы байланыс пен интернетті қамтамасыз етуді, жаңа Wi-Fi нүктелерін орнатуды, антенна-діңгек құрылыстарын салуды және талшықты-оптикалық желілерге қосылуды қамтиды.
Алматы өңірінде Шымбұлақ курорты жоғары жылдамдықты интернетпен және қосымша Wi-Fi нүктелерімен (Медеуді қоса алғанда) қамтамасыз етілген. 2029 жылға дейін Қаскелең және Түрген учаскелерінде байланыс желілерін дамыту жоспарланған.
Ақтауда 2024 жылы 76 4G базалық стансасы орнатылып, 67-сі жаңғыртылды. 2025 жылдың соңына қарай қалада 5G қамтуды 60%-ға дейін жеткізу жоспарлануда.
Щучинск-Бурабай курорттық аймағында Бурабай және Щучьедегі қонақүйлер мен туристік орындарында антенна-діңгек құрылыстары мен Wi-Fi-нүктелері орнатылады.