Оқу-ағарту министрлігінің мәліметі бойынша «Келешек мектептері» жобасы аясындағы 217 мектеп құрылысына 1,5 трлн теңге қарастырылған.
Бұл мектептердің жартысына жуығы ауылдық жерлерде бой көтереді. Ол ауылдарда 200 мыңнан астам бала бар. Яғни, жоба қала мен ауыл мектептері арасындағы алшақтықты жоюды көздейді, деп хабарлайды aqshamnews.kz 24.kz-ке сілтеме жасап.
Жалпы Мемлекет басшысының тапсырмасы бойынша үш жылда 1231 білім ошағын жаңғырту көзделген. Олардың да жартысынан көбі ауылдық жерлерде орналасқан. Бұл жұмыстар елдегі апатты мектептер санын азайтып, үш ауысыммен оқытуды жоюды көздейді.
Жайық Мақсұтов, ҚР Оқу-ағарту министрлігі инфрақұрылымды дамыту департаментінің басқарма басшысы:
- 2021 жылы оқушылар орындарының тапшылығына сәйкес талдау жүргізген болатынбыз. 2027 жылға қарай негізгі орны тапшылығы 1 миллионға жуықты құрайтын. Яғни, осы оқушы орнының тапшылығын алдын алу үшін осы «Жайлы мектеп» іске асырылып жатыр. Осы жоба аясында оқушы орындарының тапшылығы және 3 ауысымды мектептердің мәселесі шешіледі деп күтіп отырмыз. Яғни, осы ұлттық жоба басталғаннан бері қазіргі таңда 3 ауысымды мектептердің саны 2 есеге азайды.