Қазақстанда 2026 жылы айлық есептік көрсеткіш (АЕК) мөлшері ұлғаймақ. Бұл айыппұлдардың көлеміне де тікелей әсер етеді, деп хабарлайды Aqshamnews.kz.
Қаржы министрлігі 2026–2028 жылдарға арналған республикалық бюджет жобасын жариялады. Құжат Үкіметтің мақұлдауынан өтіп, Парламент қарауына жолданды. Онда ең төменгі жалақы, зейнетақы, күнкөріс минимумы және айлық есептік көрсеткіш сынды негізгі әлеуметтік көрсеткіштер қарастырылған. Әдетте мұндай жобалар қабылданғанда көрсеткіштер өзгеріссіз қалады.
2026 жылы АЕК көлемі 4 325 теңгені құрайды. Қазіргі уақытта бұл көрсеткіш 3 932 теңгеге тең.
АЕК-тегі өсімге байланысты айыппұлдар мөлшері мынадай болады:
- Жылдамдықты асырғаны үшін – 5 АЕК немесе 21 625 теңге;
- Жол белгілері мен сызықтарын сақтамау – 3 АЕК немесе 12 975 теңге;
- Тоқтау немесе тұрақ ережесін бұзу – 5 АЕК немесе 21 625 теңге;
- Жаяу жүргіншілердің жол ережесін бұзуы – 2 АЕК немесе 8 650 теңге;
- Көлік құралдарын пайдалану ережесін бұзу – 5 АЕК немесе 21 625 теңге;
- Қауіпсіздік белбеусіз немесе мотошлемсіз жолаушы тасымалдау – 5 АЕК немесе 21 625 теңге;
- Қызыл шамға өту – 10 АЕК немесе 43 250 теңге;
- Қоғамдық орында алкоголь ішу немесе мас күйде жүру – 5 АЕК немесе 21 625 теңге;
- Қоғамдық орынды ластау – 10 АЕК немесе 43 250 теңге;
- Міндетті сақтандыру заңын бұзу (заңды тұлға үшін) – 300 АЕК немесе 1 297 500 теңге.
Осылайша, 2026 жылы айыппұлдардың көлемі едәуір өседі деп күтілуде.