Алматы әкімі Ерболат Досаев Бостандық ауданының тұрғындарымен кездесуде жол-көлік инфрақұрылымын жаңарту және жолаушылар тасымалы сапасын арттыру бойынша жүргізіліп жатқан жұмыстар туралы айтты, деп хабарлайды aqshamnews.kz
Қала басшысының айтуынша, былтыр ауданда 33 көшеде 30,5 км жол орташа жөндеуден өтті. Биыл тағы 26 көшеде 30,3 км жол жөнделеді.
Сонымен қатар, ағымдағы жөндеу жұмыстары аясында 30 мың шаршы метр жол төсемі қалпына келтіріліп, 32 км арық жүйесі салынды. 2025 жылы тағы 30 мың шаршы метр жолды жөндеу және 24,4 км арық жүйесін салу жоспарланған.
«Инклюзивті ортаны құру мақсатында биыл мамыр айында 5 жерүсті және 12 жерасты жаяу жүргіншілер өткеліне күрделі жөндеу жүргізіледі. Жөндеу барысында жеделсатылар мен көтергіш құрылғылар жаңартылады. Жұмыс жыл соңына дейін аяқталады», – деді Ерболат Досаев.
Кездесу барысында Алматы әкімі ауданда қоғамдық көлік қызметінің сапасын арттыру бойынша атқарылып жатқан жұмыстар туралы да хабарлады. Өткен жылы қоғамдық көлік паркі 66 жаңа автобуспен толықты, бұл 25 қолданыстағы маршрутты жаңартуға және қосымша автобус қосуға мүмкіндік берді. 2025 жылдың мамыр айында тағы 18 жаңа автобус 8 маршрутқа қосылады.
Бұған қоса, ауданда тәртіп пен қауіпсіздікті қамтамасыз ету мақсатында 2024 жылы 26 «Сергек» аппараттық-бағдарламалық кешені және 1 100 бейнебақылау камерасы орнатылды.