Алматыда инженерлік инфрақұрылымды жаңғырту белсенді түрде жүргізілуде, деп хабарлады қалалық энергетика және сумен жабдықтау басқармасы.
2025 жылы 260 км жаңа желі салынып, 87 км желі жаңғырту жоспарланған. Өткен жылдың 9 айында 219 км жаңа сумен қамту және су бұру желілері салынса, 29,3 км қолданыстағы желілер жаңғыртылған.
Сондай-ақ, 2025 жылы 123 км электрмен жабдықтау желілері реконструкциядан өтеді. Бұған қоса, Алматы қаласының электр желілерін 2030 жылға дейін және 2040 жылға дейінгі перспективамен дамыту схемасы әзірленген.
2024 жылы сапалы жылумен қамтамасыз ету үшін қалада 20 км желі жаңартылды. Қазіргі жылыту маусымы қалыпты режимде, ешқандай іркіліссіз өтуде. Жалпы, 404 білім беру нысаны, 128 денсаулық сақтау мекемесі және 8 863 тұрғын үй жылумен қамтылған.
Жалпы, Алматы әкімі берген тапсырма аясында қалада инженерлік желілерді жаңғырту және қайта құру бойынша кешенді шаралар белсенді түрде жүзеге асырылуда. Осы шаралардың нәтижесінде 2025 жылы су құбырлары желілерінің тозу деңгейі 52,9%-ға, кәріз желілерінің тозуы 53,8%-ға, ал электрмен жабдықтау желілерінің тозуы 63,3%-ға дейін төмендейді.