2025 жылдың басынан бері 267,2 мың қазақстандық, оның ішінде 45,2 мыңға жуық жұмыссыз Skills Enbek онлайн-платформасында оқудан өтіп, сертификат алды. Платформада қазіргі таңда 809,8 мың адам тіркелген, олардың 311,1 мыңы биыл қосылған. Жобаның іске қосылғанынан бері 678,1 мың адам білім алған.
Жұмыссыздар қатарындағы 12,4 мыңға жуығы Түркістан, Қызылорда, Қостанай облыстары мен Шымкент қаласының жастары.
Платформа іске қосылғаннан бері авторлар 1 000-нан астам курс жариялады, оның 340-ы тегін. Сондай-ақ Courstore, Fluent Education және Яндекс Қазақстан серіктестерінің курстары бар. Курстардың ұзақтығы 1-ден 72 сағатқа дейін.
Шілде айында ең көп сұранысқа ие болған курстар қатарында «Твой карьерный старт: как использовать “Электронную биржу труда”», «Кассир», «Страховой агент», «Профессиональный курс индивидуального помощника для сопровождения лиц с трудностями в передвижении» және «Построение отдела продаж в отеле» бар.
Платформада SMART SKILLS, басқару және басқа да салалар бойынша тегін курстар саны артып келеді. Жоба халықтың білім деңгейі мен кәсібилігін арттыруға, мансаптық дамуды ынталандыруға және «өмір бойы оқыту» тұжырымдамасын ілгерілетуге бағытталған.
Оқу қарқынын, тілін және материалды беру форматын (мәтін, бейне, аудио, инфографика) әр білім алушы өзі таңдайды. Курсты аяқтау үшін 70% немесе одан жоғары нәтижемен тест тапсырып, бағалау жүргізу қажет. Сертификат Enbek.kz порталындағы түйіндемеге автоматты түрде қосылады және жұмыс берушілерге көрінеді.
Авторлар үшін курстарды тегін жариялау, сабақ құрастырушы, статистика, сертификат үлгілері және оқу құнын есептеу калькуляторы қолжетімді. Платформа ерекше қажеттіліктері бар адамдарға бейімделген.
2023 жылдың желтоқсанынан бастап курстарды Enbek мобильді қосымшасы арқылы да өтуге болады. Қосымшаны Google Play немесе App Store-дан жүктеуге болады.
Тіркелу және жұмыс істеу бойынша сұрақтар үшін «ЕРДО» АҚ қызметкерлеріне 8 (7172) 95 43 17 (ішкі 877, 888) нөмірі арқылы хабарласуға болады.