Министр Шарлапаев Қазақстанға көліктерді әкелуге тыйым салу жайлы пікір білдірді
Қазақстанда көлік құралдарын әкелу тәртібіне өзгеріс енгізілді. Енді жылына бір көліктен артық әкелгісі келетін адам заңды тұлға ретінде тіркелуі тиіс, деп хабарлайды aqshamnews.kz
Сонымен қатар, әкелінетін көлік үш жылдан ескі болмауы керек. Өнеркәсіп және құрылыс министрі Қанат Шарлапаев брифинг барысында бұл талаптың 2015 жылдан бері қолданыста екенін, бірақ енді тәртіптің біршама қатаңдатылғанын атап өтті.
«2023 жылы бір адамның 793 көлік әкелген жағдайы болды. 34 адам 100-ден астам көлік әкелді. Бұл әрекеттер кәсіпкерлік қызметтің айқын белгілеріне жатады. Мұнда қандай да бір шектеу енгізу емес, мәселе заң талаптарын сақтау жайында. Егер адамдар көлік әкелу арқылы кәсіпкерлікпен айналысқысы келсе, яғни жүздеп көлік тасымалдаса, олар мемлекеттік органдардың заңды талаптарын орындауы қажет. Барлық тиісті төлемдерді төлеулері керек», – деді министр.
Министрдің айтуынша, егер адам көлік сатумен айналысқысы келсе, онда жауапкершілікті мойнына алып, ЖШС ашып, ресми дилер ретінде тіркелуі қажет.