Америкалық инженер Солтүстік Калифорнияда өткен дәстүрлі алып асқабақтарды өлшеу жарысында бас жүлдені жеңіп алды, деп хабарлайды aqshamnews.kz Российская газетаға сілтеме жасап.
Ол өсірген асқабақтың салмағы — 1064 килограмм.
Associated Press агенттігінің хабарлауынша, Калифорния тұрғыны Брэндон Доусон 52-ші әлем чемпионатында жеңімпаз атанды. Инженер өсірген бұл алып асқабақтың салмағы шағын жеңіл көліктің немесе ересек бизонның салмағына тең.
Доусонның айтуынша, ол бақша шаруашылығымен, соның ішінде ірі асқабақ өсірумен, бес жылдан бері айналысады. Инженер өзінің электромобиль шығаратын компаниядағы жұмысы кезінде алған дағдылары бұл істе көп көмегін тигізетінін айтты. Жеңісі үшін ол 20 мың доллар көлемінде сыйақыға ие болды.
Өткен жылы Доусонның асқабағы Миннесота штатындағы мұғалім Трэвис Гингер өсірген 1121 килограммдық асқабақтан жеңілген болатын. Гингер 2023 жылы Калифорниядағы жарыста рекорд орнатқан еді — оның алып асқабағы 1247 килограмм тартқан. Алайда биыл оның асқабағы маусым басында зақымданып, жарыс ережесіне сай қатысу мүмкіндігінен айырылды.