Ақсай шатқалындағы табиғи өртті 150-ден астам адам мен тікұшақ сөндіріп жатыр, деп хабарлайды Aqshamnews.kz Төтенше жағдайлар министрлігінің баспасөз қызметіне сілтеме жасап.
«Өрт Алматы облысы Қарасай ауданындағы Көклайсай саяжайлары маңында тұтанған. Қазіргі таңда өрт аумағы нақтыланып жатыр. Қаза тапқандар мен зардап шеккендер жоқ. Жақын маңдағы саяжай тұрғындары алдын ала өз еріктерімен эвакуацияланған. Қазір өрттің тұрғын үйлер мен оған жақын аумақтарға таралу қаупі жойылды. Оқиға орнына Алматы облыстық ТЖД, Алматы қаласының ТЖД, ТЖМ-нің №28237 әскери бөлімі және мемлекеттік ұлттық табиғи парк қызметкерлері жұмылдырылды. Барлығы 150-ден астам адам мен 20 техника бірлігі жұмыс істеуде», – делінген жексенбі күні таратылған хабарламада.
Ведомствоның мәліметінше, өртті сөндіруді жер бедерінің күрделілігі мен ауа райы қиындатып отыр. Соған қарамастан, өртті толықтай жою жұмыстары жалғасып жатыр.
«Қосымша ретінде ҚР ТЖМ-нің “Қазавиақұтқару” АҚ-ына тиесілі су шашуға арналған құрылғысы бар Ми-8 тікұшағы тартылды», – делінген хабарламада.