Алматыдағы №145 мектепті сейсмикалық күшейту және жөндеу жұмыстары 2023 жылдың 20 қыркүйегіне дейін аяқталады
Алматы қаласының Бостандық ауданындағы №145 жалпы білім беретін мектеп ғимараты бүгінде 85%-ға дайын. Ғимарат құрылымдарын сейсмикалық күшейту, ішкі бөлімдер мен терезе блоктарын орнату жұмыстары аяқталды, ішкі инженерлік инфрақұрылым жүргізілді, бірақ ішкі әрлеу және қасбеттік жұмыстар жалғасып жатыр. Бұл туралы Алматы қаласы әкімінің орынбасары Асқар Әмринге бюджет қаржысына салынатын құрылыс нысандарын аралау барысында мердігер ұйымның өкілдері баяндады.
Нысанды қалпына келтіру мен күрделі жөндеу, сейсмикалық күшейту жұмыстары 2021 жылдың 12 шілдесінде басталды. Құрылыстың аяқталу мерзімі – 2023 жылғы 30 қаңтар.
2023 жылдың ақпан айында Алматы қаласының әкімдігі «Ақ ордасы корпорациясы» ЖШС мердігерлік ұйымына сотқа талап арыз берді. Сот шешімімен «Ақ ордасы корпорациясы» ЖШС-не 3,5 млн теңге көлемінде айыппұл салынды, жауапсыз қатысушы деп танылып, мемлекеттік сатып алуға қатыспайтын болды. Апелляциялық соттың қаулысымен шешім өзгеріссіз қалды.
Мердігер ұйымға нысандағы жұмыстарды 2023 жылдың 20 қыркүйегіне дейін аяқтау жүктелді.