Қытайлық әйел 13 жылдан бері дүкенінің жарығын сөндірмей келеді. Ол бұл әрекетін әйелдердің қауіпсіздігін ойлағаны үшін жасаған, - деп хабарлайды Аqshamnews.kz тілшісі SCMP-ке сілтеме жасап.
Қытайдың орталығындағы Хунань провинциясы, Чанша қаласының 60 жастағы тұрғыны Сун Мэйхуа 13 жылдан бері түнде дүкенінің жарығын сөндірмеген. Ол бұл әрекетті 2012 жылы дүкен ашқан сәттен бастап әдетке айналдырған.
Сунның айтуынша, бірде бірнеше жас қыз оған келіп, дүкен маңындағы жарықтың үйге жұмыстан қайтып бара жатқанда қауіпсіз сезінуге көмектесетінін айтқан. Сол сәттен бастап ол сыртқы жарықты бірде-бір рет сөндірмеген.
Жарықпен бірге жұмыс уақыты да ұзартылған. Қазір дүкен түнгі екіге дейін ашық. Кейде кешкі уақытта жалғыз жүруге қорқатын қыздарды Сун үйіне дейін де шығарып салады.
Тұрғындар оны "жарық тәте" деп атап кеткен. Бұл - оның айналасындағыларға деген мейірімі мен қамқорлығына байланысты қойылған лақап.
Сун тіпті үйіндегі стационарлық телефонды дүкенге көшіріп қойған. Онымен қарт кісілер мен балалар тегін хабарласа алады, себебі кейбірі ұялы телефон ұстамайды немесе пайдалана алмайды. Жыл сайын тозған телефонын Сун жаңалап отырады.
"Қызметті тоқтату туралы ешқашан ойлаған емеспін. Мен тек көмектескім келеді", – дейді ол.
Бұған қоса, қала тұрғындары оған үй кілттерінің қосалқы көшірмесін сеніп тапсырады. Сун оларды мұқият сақтайды және қажет болғанда көмекке келеді.
"Көмек керек болса, мен бірден Мэйхуаға барамын. Мен оған сенемін", – дейді көрші әжей.
Сун мен оның күйеуі бұл ауданда 20 жылдан аса уақыттан бері тұрады. Бұрын олар мемлекеттен жәрдемақы алып келген. Әйелдің айтуынша, ол кезде жергілікті қауымдастықтан көп көмек алған. Қазір ол осы қамқорлықтың өтеуін қайтарғысы келеді.
Сун Мэйхуаның бұл оқиғасы желіде кең таралып, жұрттың жүрегін елжіретті. Әлеуметтік желі қолданушылары оның табандылығын және көмектесуге деген шынайы ниетін ерекше атап өткен.