Түрксіб ауданында ескірген 126 үйді бұзып, оның орнына жаңадан 181 көпқабатты тұрғын үй салынады. Түрксіб ауданының әкімі Бақытжан Ақжаров Өңірлік коммуникациялар қызметінде осылай деп мәлімдеді, деп хабарлайды aqshamnews.kz
Аудан басшысының айтуынша, аудан жақсы қалалық орта қалыптастыру үшін жүйелі жұмыс істей бастаған: тұрғын үй қоры жаңартылып, қоғамдық кеңістіктер абаттандырылып, инфрақұрылым жаңғыртылып жатыр. Ескі үйлерді жаңалау – осы істегі ең басты міндеттің бірі болып қалыпты.
Қазір 8 жерде құрылыс жұмысы жүріп жатыр. 28 ескі үйдің орнына 17 жаңа үй салынып, 500-ден астам тұрғын жаңа пәтерге көшкен.
Әкімнің айтуынша, оңалтуға арналған аймақтарды дамытуға ерекше көңіл бөлініпті. Шілде айында Үлкен Алматы каналында қайта құру жұмысы басталды. Мұнда демалыс аймақтары, жағажай алаңдары салынып, жаяу жүргіншілердің көпірі жаңартылып жатыр. Енді жылдың соңына дейін Баум тоғайы мен Кіші Алматы өзенінің бойындағы жаяу жүргіншілердің аймағын абаттандыруды қолға алмақшы.
«Халық қатысатын бюджет» жобасы аясында 2024 жылы Түрксіб ауданында 2 миллиард теңгеден астам қаржыға 52 жоба жүзеге асты. 2025 жылы тағы 32 жобаны іске асырмақ.
«Сонымен қатар, ауданда 850 метр арық жүйесінің күрделі жөндеу жұмыстары жоспарланған (13 учаскеде). Жасыл-желектерге күтім жасау жағы да ескерілген. 2025 жылы 20 000 ағашты кесіп, 4740 ағашты қалыпқа келтіріп, 2800 ағашты кесуді жоспарлап қойдық», - деді аудан әкімі.