5 қазан таңында биткоин бағасы тарихтағы ең жоғары деңгейге көтерілді. Криптовалюта бағасы шамамен 2,7%-ға өсіп, 125 245,57 доллар деңгейіне жетті, деп хабарлайды Aqshamnews.kz тілшісі.
Бұған дейінгі рекорд биыл тамыз айының ортасында тіркелген болатын — 124 480 доллар. Ол кезде биткоиннің қымбаттауына АҚШ президенті Дональд Трамп әкімшілігінің цифрлық активтерге қатысты жұмсақ реттеу саясаты және институционалдық инвесторлардың қызығушылығы әсер еткен еді.
Сарапшылардың айтуынша, биткоин соңғы сегіз сауда күні қатарынан өсім көрсетіп, оған АҚШ қор нарығындағы оң динамика мен биткоин-ETF-терге капитал құйылуы себеп болған.
Сонымен қатар, АҚШ доллары негізгі әлемдік валюталарға қатысты әлсіреп, бірнеше аптадағы ең төмен көрсеткішке түсті. Бұл жағдайға АҚШ үкіметінің жұмысы уақытша тоқтауы мүмкін деген қауіп және негізгі экономикалық деректердің жариялануының кейінге шегерілуі ықпал еткен.
Айта кетейік, АҚШ-тағы сайлауға дейінгі биткоиннің тарихи максимумы 70 184 доллар (шамамен 34 млн теңге) болған еді.