Есірткі таратқаны үшін сотталған 1200 адам шартты түрде мерзімінен бұрын шығуы мүмкін. Бұл туралы Ішкі істер министрлігінің Есірткі қылмысына қарсы іс-қимыл комитетінің төрағасы Қуандық Әлжанов хабарлады. Бұл туралы Aqshamnews.kz сайты хабарлайды.
Қуандық Әлжановтың айтуынша, 2024 жылдың соңында «Есірткі заттарының заңсыз айналымына қарсы іс-қимылға қатысты» заңнамалық актілерге өзгерістер енгізілді. Жаңа талаптарға сәйкес, есірткі сатуды ұйымдастырғандар мен оны таратқандар үшін жаза екіге бөлінді.
Бұрын есірткіні таратумен айналысқан барлық тұлғалар бір бап бойынша қылмыстық жауапкершілікке тартылса, енді есірткіні әр жерге жасырып қойып жүргендер (қолданушыларға жеткізушілер) бірінші рет ұсталса, шартты түрде мерзімінен бұрын босату құқығына ие бола алады. Алайда, министрлік өкілінің айтуынша, әр жағдай жеке қаралатын болады.
Бұл заң өзгерісі қоғамда қызу талқылануда. Бір тарап бұл қадам есірткімен күресті әлсіретеді деп алаңдаса, екінші тарап жазаның ауырлығы қылмыскерлерді әлеуметтік бейімделу мүмкіндігінен айырмауы керек деп санайды.