«Келісіп пішкен тон келте болмайды». Елдің ертеңі мен болашағына қатысты маңызды мәселелер халықтың талқысына түсіп, қоғамның талқылауынан өтуі тиіс. Содан кейін ғана маңызды шешім қабылданады. Атом электр станциясын салуды қолдау жөніндегі Халықтық штаб мүшелері Түркістан облысының мәдениет саласы өкілдерімен кездесуінде осындай пікір білдірді.
Дөңгелек үстелге қатысушылар бұл біздің қоғамда жаңа саяси мәдениет қалыптасқанының көрінісі екенін атап өтті. Штаб мүшелері электр энергиясының тапшылығы бүгінде еліміздің оңтүстік өңірлерінде ерекше сезіліп отырғанын жеткізді. Мамандардың айтуынша, өткен жылдың қорытындысы бойынша мұндағы тапшылық сағатына 3,1 млрд кВт құраған. Салыстырмалы түрде айтсақ, орташа есеппен 100 мың тұрғыны бар бір қала жылына 700 млн кВт электр энергиясын тұтынады екен.
«Сондықтан көрші елдерге тәуелділіктен арылу үшін қажетті қуат көзін өзімізде өндіретін атом электр станциясын салуымыз қажет», – дейді мамандар.
Халықтық штаб мүшесі Қайрат Балабиев: «Күн мен жарық – ең алдымен халыққа керек нәрсе. Қазіргі уақытта біз электр қуатын Ресейден және біршама Қырғызстаннан алып отырмыз. Шымкент қаласының өнеркәсібі мен халқы тұтынатын электр энергиясының жылдық қажеттілігі толық қамтамасыз етілмеген. Сондықтан да біздің болашағымыз мықты, мемлекетіміз бай болу үшін, біз электр энергиясы жағынан тәуелсіз болуымыз қажет», – дейді.