2023 жылы спорт және дене шынықтырумен айналысатын ерекше қажеттіліктері бар адамдар саны 56 822-ні құрады. Бұл туралы бүгін ҚР Туризм және спорт министрлігінің баспасөз қызметі мәлімдеді.
Министрлік таратқан ақпаратқа сәйкес, 10 күннен кейін Парижде XVII Жазғы Паралимпиада ойындары басталады. Осы жолы Қазақстан құрамасы рекордтық жолдамаға ие болды.
«Біздің құрама спорттың 9 түрінен (паражүзу, пара пауэрлифтинг, пара жеңіл атлетика, пара каноэде есу, пара таэквондо, отырып ойнау волейболы – ерлер, пара ату, пара үстел теннисі, пара дзюдо) 33 лицензия иеленді. Жалпы 44 спортшы Парижге барады. Айта кету керек, каноэде есу (әйелдер), үстел теннисі және отырып ойнау волейболынан алғаш рет лицензия жеңіп алдық», - делінген хабарламада.
Сонымен қатар, Астанада 8-13 қыркүйек аралығында осы жылдың маңызды оқиғаларының бірі – Дүниежүзілік Көшпенділер ойындары өтеді. Бұл ауқымды шараға 100-ге жуық мемлекеттің делегациясы қатысады деп күтілуде. 2500-ден астам спортшы өзара бақ сынасады. Қазіргі уақытта 89 ел өз қатысуын ресми түрде растады. Көшпенділер ойындарында ұлттық спорттың 21 түрінен 97 медаль жиынтығы сарапқа салынады.