Биыл бюджет шығыстарының тиімділігін арттыру үшін жаңа 10 жол учаскесінде ақылы жол енгізілді, деп хабарлайды aqshamnews.kz үкіметтің мәліметіне сілтеме жасап.
2025 жылы құрылыс және жөндеу жұмыстарымен барлық санаттағы 13 мың шақырымға жуық автожолдар қамтылды, оның ішінде:
2,2 мың шақырым республикалық маңызы бар жолдарды салу және реконструкциялау;
6,6 мың шақырым республикалық желіні күрделі және орташа жөндеу;
4,1 мың шақырым жергілікті жолдарды жаңарту жұмыстары бар.
"Бюджет шығыстарының тиімділігін арттыру үшін жалпы ұзындығы 2 мың шақырым болатын жаңа 10 жол учаскесінде ақылы жол енгізілді. Нәтижесінде ақылы күре жолдардың жалпы ұзындығы 3,2 мың шақырымнан 5,2 мың шақырымға дейін ұлғайды", - деп жазылған хабарламада.
Жыл соңына дейін 6,1 мың шақырымдық жол жұмыстарын аяқтау жоспарланып отыр. Олар – құрылыс және реконструкциялау (847 шақырым), күрделі және орташа жөндеу (2,2 мың шақырым) және жергілікті маңызы бар жолдарды (3,1 мың шақырым) жөндеу жұмыстары.