25 жастағы Ерзат Егізбайдың денесі Алматыда табылды, – деп хабарлайды aqshamnews.kz тілшісі.
Ерзат 19 мамыр күні жұмысқа кетіп, содан кейін хабарсыз кеткен. Оны полиция қызметкерлері мен еріктілер бірнеше күн бойы іздеді.
Іздеу жұмыстарына Алматы полиция департаментінің жеке құрамы, сондай-ақ «Қоғам» және «Лидер KZ» еріктілер ұйымдары жұмылдырылған.
«Лидер KZ» ұйымы марқұмның жақындарына көңіл айтып, іздеу жұмыстарының аяқталғанын хабарлады.
Бұған дейін Ерзаттың 19 мамыр күні әдеттегідей жұмысқа кеткені, бірақ үйіне оралмағаны айтылған. Туыстарының сөзінше, ол сағат 14:00 шамасында басшысынан дүкенге сұранып шығып, кейін автобусқа отырып, Еңбекшіқазақ ауданындағы Космос ауылы жаққа кеткен. Оның телефоны соңғы рет сол маңда белсенді болған.
Жұбайының айтуынша, Ерзат бұған дейін үйден ескертусіз кетпеген. Ол қылмыстық жауапкершілікке тартылмаған және есепте тұрмаған.