Алмалы ауданының комьюнити-орталығының жетекшісі Нұрасыл Аманғазы жаңа конституция жастарға қосымша мүмкіндік беріп, олардың елдің дамуындағы ерекше рөлін бекіткенін атап өтті, – деп хабарлайды aqshamnews.kz тілшісі.
Оның айтуынша, жаңартылған заңның негізгі ережесінің бірі – адам капиталының мемлекеттің стратегиялық ресурсы ретінде танылуы. Бұл жастар бастамсын қолдауға, білім беруді дамытып, жас азаматтардың өзін-өзі жүзеге асыруына қосымша жағдай жасайды.
«Жаңа конституция кең ауқымды қоғамдық талқылаудың нәтижесінде қабылданып, елдің барлық өңірлерінен түскен азаматтардың ұсынысы ескерілді. Бұл нағыз халықтық құжат», – дейді Нұрасыл Аманғазы.
Оның пікірінше, еріктілік қызметтің конституциялық деңгейде бекітілуі де ерекше назар аударуға лайық.
«Еріктілердің қызметі алғаш рет конституция деңгейінде құқықтық қорғау мен қолдауға ие болды. Бұл белсенді жастар мен еріктілер ұйымдары үшін дамуға, қоғамдық өмірге қатысуға мүмкіндік беріп отыр», – деп атап өтті ол.
Жастар қауымдастығы өкілінің айтуынша, еріктілер қозғалысын қолдау азаматтық белсенділікті нығайтып, жастарды қоғамдық маңызы бар міндеттерді шешуге кеңінен тартуға ықпал етеді.