Алматыдағы Әбілхан Қастеев атындағы ҚР Мемлекеттік өнер музейінде белгілі зергер Серікқали Көкеновтың «Жаңғырту» атты жеке көрмесі ашылды.
«Серікқали Көкенов — көне әдіс-тәсілдерді қайта жаңғыртып заманауи дем беруші шебер. Оның қолданысында Қазақстанда б.д. дейінгі ІV-III ғасырлармен белгіленген бүртіктеу және сіркелеу көне әдістері басым. Орталық және Батыс Қазақстан өңірлерінде қонданылатын, өте ептілікті қажет ететін бұл әдістердің заманауи жаңғырығы зергердің негізгі қаруы. Зергер туындыларында еліміздің аумағында өңделетін асыл тастарды қолдану арқылы тақырыптық бұйымдар жасауда ізденісі сарқылмаған. Пайдаланатын материалдарға маржан, жақұт, көгілдір асыл тастар, тау кристалдары және т.б. бағалы тастар кіреді», — дейді көрме жетекшісі, музейдің «Қазақстан сәндік-қолданбалы өнері» бөлімінің ғылыми қызметкері Ақжігіт Нүсіп.
Көрме зергердің шығармашылығының кейінгі кезеңіндегі жұмыстарынан құралған. Экпозицияда 150-ден астам зергерлік бұйым, 6 панно және 10 мүсіндік туындылары таныстырылды. Біраз бөлігі жиынтықты бүртіктеу және сіркелеу әдістерімен орнындалған дәстүрлі әшекей бұйымдардан тұрады. Ал қалған жұмыстары көрікті жерлерді сипаттау, ұлттық құндылықтарды баяндау және түрлі тақырыптарда орындалған. Әр бұйымның жасалу әдіс-тәсілдері ұқсас болғанымен, пішіндері мен тақырыптық мағыналары бөлек. Әшекейлердің бірнеше түрлерін ұштастыру арқылы ізденістік шығармалары да кездеседі. Нәзіктік пен терең тақырыптық ізденістерді көрмеден бірден аңғарасыздар.
Ерекше туындылар музей төрінде қазан айының 2-не дейін тұрады.