2026 жылғы 1 қаңтардан бастап БЖЗҚ-дан төленетін зейнетақы төлемдері мен тұрғын үй/емделуге арналған біржолғы зейнетақы төлемдері (БЗТ) жеке табыс салығынан (ЖТС) босатылды, деп хабарлайды Aqshamnews.kz тілшісі.
БЖЗҚ түсіндірмесіне сәйкес, жаңа Салық кодексі күшіне енгеннен кейін ЖТС енді:
-
БЖЗҚ-дан төленетін зейнетақының барлық түрінен;
-
тұрғын үй жағдайын жақсартуға арналған БЗТ-дан;
-
емделуге арналған БЗТ-дан ұсталмайды.
Ерекшелік: ЖТС тек Қазақстан Республикасының резиденті емес тұлғаларға төленетін зейнетақы төлемдерінен ұсталады.
Бұрын (2026 жылға дейін) зейнетақы төлемдері мен БЗТ-ға 10% ЖТС салынатын: салық не бірден ұсталды, не кейінгі зейнетақы төлемдері кезінде кейінге қалдырылып өндірілетін. 2026 жылғы 1 қаңтардан бастап:
-
барлық зейнетақы төлемдерінен ЖТС ұстау тоқтатылды;
-
БЗТ толықтай салықтан босатылды;
-
тұрғын үй/емделуге алынған БЗТ бойынша бұрын есептелген, бірақ кейінге қалдырылған ЖТС міндеттемелері жойылды.
Бұл ретте, бұрын төленген салықты жалпы тәртіппен қайтару қарастырылмаған, тек жекелеген санаттарға қатысты
Салық кодексінің 404-бабында көрсетілген санаттар (I–III топ мүгедектігі бар адамдар, мүгедек бала асыраушылары/қамқоршылары, асырап алушылар, ұрыс қимылдары ардагерлері және т.б.) бұрын БЗТ алған кезде ЖТС төлеп қойған болса, БЖЗҚ-ға өтініш беріп, құжаттарын ұсыну арқылы қайта есептетіп, салықты қайтарта алады. Өтініш беру мерзімі - БЗТ алған күннен бастап 3 жыл.
2026 жылдан бастап жеке тұлғаның өз пайдасына аударған ерікті зейнетақы жарналары бойынша салықтық шегерім алынып тасталды. Бірақ жұмыс беруші төлейтін ерікті жарналарға жеңілдік сақталады: ол қызметкердің табысы болып есептелмейді және ЖТС салынбайды, ал жұмыс беруші оны КТС есептегенде шегерімге жатқыза алады.