Ресей Президенті Владимир Путин Әзербайжан Президенті Ильхам Әлиевтен кешірім сұрады, деп хабарлайды Ресей Сыртқы істер министрлігінің баспасөз қызметі.
Ресей тарапының бастамасымен Ресей Федерациясының Президенті Владимир Путин мен Әзербайжан Республикасының Президенті Ильхам Әлиев арасында телефон арқылы әңгіме өтті. Владимир Путин бұл қайғылы оқиғаның Ресей әуе кеңістігінде болғанына байланысты кешірім сұрап, қаза тапқандардың отбасыларына терең және шынайы көңіл айтты, сондай-ақ жарақат алғандарға тез сауығып кетуін тіледі.
Әңгіме барысында Ақтауда болған ұшақ апатына қатысты мәселелер талқыланды.
Әзербайжанның жолаушылар ұшағы кесте бойынша ұшып келіп, Грозный әуежайына бірнеше рет қонуға әрекет жасады. Сол уақытта Грозный, Моздок және Владикавказ қалалары украиналық ұшқышсыз ұшу аппараттарының шабуылына ұшырады, ал Ресейдің әуе қорғаныс жүйелері бұл шабуылдарды тойтарыс беруге тырысты, деп хабарлады Ресей СІМ.
Ресей Тергеу комитеті Қылмыстық кодекстің 263-бабы бойынша (көлік қозғалысы және әуе көлігі пайдалану қауіпсіздігі ережелерін бұзу) қылмыстық іс қозғады. Алғашқы тергеу әрекеттері жүргізілуде, азаматтық және әскери мамандардан жауап алынуда.
Әзербайжан Бас прокуратурасының екі қызметкері Грозный қаласына барып, Ресей Федерациясының Бас прокуратурасы және Тергеу комитеті өкілдерімен бірлесіп жұмыс істеп жатыр.
Әзербайжан Президентінің баспасөз қызметі Путиннің Ресей әуе кеңістігінде рейске сыртқы физикалық және техникалық әсер жасалғанына байланысты кешірім сұрағанын растады.