Ұшақтың кешігуі үнемі қолайсыздық тудырады. Мұндайда жолаушы өтемақы талап ете ала ма? Бұл үшін қандай заңдарға сүйенуге болады? Толығырақ Аqshamnews.kz материалында.
Қазақстандағы ережелер
Қазақстанда жолаушылар құқығы «Қазақстан Республикасының әуе кеңістігін пайдалану және авиация қызметі туралы» заңымен қорғалады. Заңның 86-бабында кешігуге байланысты нақты талаптар көрсетілген:
-
2 сағаттан артық күтсеңіз, 2 рет тегін қоңырау шалуға немесе 2 хабарлама жіберуге құқығыңыз бар;
- Балалары бар аналарға арнайы бөлме берілуі керек;
-
4 сағаттан асса, тамақ берілуге тиіс (күндіз әр 6 сағат сайын, түнде әр 8 сағат сайын);
-
күндіз 8 сағаттан, түнде 6 сағаттан артық күткенде қонақ үймен қамтамасыз ету міндетті;
-
рейс 5 сағаттан аса кешіксе, ақшаны толық қайтаруды немесе басқа рейске тегін билет алуды таңдай аласыз.
Барлық шығынды әуе компаниясы өзі көтереді. Егер олар міндетін орындамаса, ҚР Тұтынушылардың құқықтарын қорғау комитетіне немесе Азаматтық авиация комитетіне шағымдануға болады.
Жалпы рейстер неге кешігеді?
Рейстер бірнеше себеппен кешігуі мүмкін:
- ауа райының қолайсыздығы (қатты жел, тұман, боран және басқалары);
- аяқ астынан туындаған және алдын алу мүмкіндігі жоқ техникалық себеппен, оған ұшақты ауыстыру да жатады;
- кейде бір ұшақтың кесірінен одан кейінгі рейстер бірінен кейін бірі кешігеді.
- Жолаушылардың өміріне немесе денсаулығына қауіп төндірмеу үшін жүргізілетін жұмыстардан да кешігу болады.
- Кейде жолаушы ұшаққа мініп, кейін ұшудан бас тартуы мүмкін.
- Әуе компаниясы ұшу кестесінің жоспарлы және жоспардан тыс өзгеруі мүмкін.
Еуропадағы ережелер
ЕО елдерінде және оған қосымша бірқатар аумақта №261/2004 регламенті мен Монреаль конвенциясы қолданылады.
-
1500 шақырымға дейінгі қашықтықта — 2 сағаттан кешіксе, тегін тамақ пен сусын беріледі;
-
1500–3000 шақырым — 3 сағаттан соң қызмет көрсетіледі;
-
5 сағаттан артық кешіксе, билет құнын қайтарып алуға немесе басқа рейске ауысуға болады.
Сонымен қатар, 125-тен 600 еуроға дейін өтемақы талап етуге мүмкіндік бар.
АҚШ, Азия және Африка
Бұл аймақтарда бірыңғай заң жоқ, бәрі тасымалдаушының ережесіне байланысты.
-
АҚШ-та тек бір талап бар: рейс 2 сағаттан кешіксе және жолаушылар ұшақ ішінде отырса, су мен тамақ берілуі керек.
-
Азия мен Африкада да заңдар елге қарай өзгереді, көп жағдайда компанияның өз саясаты шешуші рөл атқарады. Сондықтан билет аларда әуе компаниясының беделін, кешігу тарихын алдын ала қарап шыққан жөн.