Ұлытау облысында полиция қызметкерлері ірі көлемдегі марихуана тәркіледі, деп хабарлайды Aqshamnews.kz тілшісі Polisia.kz сайтына сілтеме жасап.
Облыстық ПД есірткі қылмысына қарсы іс-қимыл басқармасы арнайы бөлімшелермен бірлесіп, “Қарасора — 2025” жедел-профилактикалық іс-шарасы барысында Жезқазған – Қызылорда тас жолында Mercedes-190 автокөлігін тоқтатқан.
Тексеру кезінде көліктің жүксалғышындағы газ жабдығының астынан скотчпен оралған екі целлофан қап табылған. Оның ішінен ерекше иісі бар өсімдік тектес зат шыққан. Сараптама қорытындысы тәркіленген заттың жалпы салмағы 15 келі болатын марихуана екенін растады.
Тергеу деректеріне сүйенсек, есірткі басқа өңірлерден әкелініп, кейін сату үшін жоспарланған. Қара нарықтағы мұндай партияның бағасы шамамен 3 миллион теңге шамасында.
Есірткіні сақтау және тасымалдау күдігімен 43 және 27 жастағы екі адам ұсталып, оларға қатысты ҚР Қылмыстық кодексі бойынша сотқа дейінгі тергеу басталды.