Ұлттық ұланның «Оңтүстік» өңірлік қолбасшылығына қарасты әскери бөлімдерінде 2025 жылғы жаңа оқу кезеңі басталды.
Қолбасшылық басқармасының офицерлерімен, сондай-ақ, Алматыдағы 5571 әскери бөлімінің әскери қызметшілерімен және сарбаздармен алғашқы тәрбиелік сабақты Астанадан арнайы келген Ұлттық ұлан Бас қолбасшысының тәрбие және әлеуметтік-құқықтық жұмыстар жөніндегі орынбасары, Халық қаһарманы генерал-майор Қайрат Үмбетов жүргізді.
Сабақ барысында Ұлттық ұлан Бас қолбасшысының биылғы оқу жылына қойған жауынгерлік тапсырмаларын нақтылап өтті. Сондай-ақ, құқықтық тәртіп әскеріндегі тәрбие және ақпараттық-имидждік жұмыстардың маңыздылығына ерекше тоқталып өтті.
– Қазақстан Республикасы Ішкі істер министрінің, Ұлттық ұлан Бас қолбасшысының негізгі талаптарының бірі – заңдылық пен тәртіп. Ұлттық ұлан әскерінде құқық бұзушылыққа жол жоқ. Бәріміз ең бірінші кезекте сарбаздардың денсаулығы мен амандығын қамтамасыз етуіміз керек. Бұл әскер басшылығының талабы, Мемлект басшысы Қасым-Жомарт Тоқаев өзінің Жолдауында осы мәселеге ерекше назар аударды, – деді Қайрат Жарылқасынұлы.
Сонымен қатар, ол Ұлттық ұлан әскерінің еліміздің өркендеуі һәм тыныштығы жолындағы қосқан үлесін тілге тиек етті. Алғашқы тәрбиелік сағаттан кейін саптық алаңда сап түзеген ұландықтар қару-жарақ пен әскери техниканы, сондай-ақ, әскери мүліктерді дұрыс қолдану, кез келген міндеттерді атқару кезінде қауіпсіздік іс-шараларын қатаң сақтау бойынша сабақтарға тарасты.
Сабақтар барысында жеке құрамға қызметтік-жауынгерлік әрекеттердің барлық бағыты бойынша арнайы дайындалған бейнероликтер көрсетілді.
Жаңа оқу жылында қоғамдық тәртіп пен қауіпсіздікті қамтамасыз ету бойынша ұландықтардың алдында көптеген жауапты міндеттер тұрғаны шегеленді.