Алматы төрінен ашылған «Тағзым» мемориалын көріп, жүрек тебіренді.
Күні кешегі қаңтар оқиғасын ұмыта қоймадық, содан да болар, көңілді мұң басты бір сәт. Мемориал сол сәттерді көз алдымызға әкелгендей. Демек, бұл кешен бізге өткенді ұмытпауды, одан сабақ алуды үндеп тұрғандай.
«Тағзым» өзгеше туынды болып шыққан екен. Іргелі кешеннің түрлі түсті стеллаларға бөлінгені үлкен шығармашылық ізденісті байқатады. Қара түсі айтпаса да түсінікті, жыл басындағы қаралы күндердің дүрбелеңін беріп тұрғандай. Ал ақшыл сұр бөлігі сол қиын күндерді еңсеруді білдірсе керек. Сәулетшілер сұр бөлігінде қаңтар оқиғасында құрбан болған отандастарымызға тағзым көрсеткендей әсерде болдым. Ал ақ түс жақсылыққа ұмтылатынымызды көрсеткендей. Иә, авторлардың шешімі ұнады. Ондағы елге белгілі тұлғалардың қашап жазылған әр сөзі үлкен-кішінің көкейінде жүруге тиіс деп ойлаймын.
Еліміздің алтын бесігі – Алматыны алдағы уақыттары тек жақсы қырынан көргіміз келеді.