Алматы қаласы бойынша Қылмыстық-атқару жүйесі департаментіне қарасты №11 мекемесінде жазасын өтеуші жасөспірімдер арасында Алматы қаласы Спорт басқармасы «Ұлттық спорт және ат спорты түрлері спорт клубының» қолдауымен ұлттық спорт түрлерінен жарыс өтті, деп хабарлайды aqshamnews.kz.
Нақтырақ айтсақ, жастар асық атудан, 16 кг гір тасын көтеруден, арқан тартудан және тоғызқұмалақ ойнап жарысты. Асық ату спортының жаттықтырушылары Рауан Тоқтарбай, Архат Сейітқожанов балалармен топтық ойындар өткізіп, жеңімпаздарды анықтады. Гір тасын көтеру жаттықтырушысы Ернар Әбиқожа және тоғызқұмалақтан Берік Сембаев, арқан тартыс ойынын қадағалаған Ермұхан Шарқабаев та қызықты ойындар өрнегін көрсете білген жастарға қызықты кеш сыйлады.
– Ұлттық және ат спорты түрлері спорт клубының құрамында тек ат спорты ғана емес, асық ату, дәстүрлі садақ ату, жекпе-жек, құсбегілік, тоғызқұмалақ, қазақ күресі сынды ұлттық ойындар да бар. Ұлттық спорт дегенде – ұлттық рух, мәдениетіміз бен дәстүріміз еске түседі. Жалпы, кейінгі жылдары елімізде ұлттық спорт түрлері қарқынды дамып келеді. Жастар арасында ұлттық спорт түрлерін насихаттау – басты мақсат. Гір көтеруге білек күші, тоғызқұмалақ ойнауға зеректік, ал асық атуға дәлдік, мергендік керек. Балалар колониясында да спортты сүйетін, бас бостандығынан айырылса да салауатты өмір салтын ұстанатын осындай сергек жастардың көптігіне қуандық, – дейді Рауан Тоқтарбай.
Жеңімпаздарға Алматы қаласы Спорт басқармасының мақтау қағаздары табысталды.
