Жыл сайынғы отандық тауар өндірушілердің «ULTTYQ ÓNIM» көрмесі биыл жетінші рет өткізілмек.
Ол 2023 жылдың 5-7 мамыры аралығында Алматы қаласындағы «Атакент» іскерлік ынтымақтастық орталығынының 11 павильонында өтеді. 2015 жылдан бері көрмені «Даму» кәсіпкерлікті дамыту қоры» АҚ ұйымдастырып келеді, деп хабарлайды Almaty-akshamy.kz.
Іс-шараның ашылуы 05.05.2023 жылы сағат 10:00-ге жоспарланған. Ресми бөлімнің соңында кәсіпкерлер мен БАҚ өкілдері үшін баспасөз конференциясы өтеді.
Жыл сайынғы «ULTTYQ ÓNIM» көрмесінің ашылу салтанаты ҚР Премьер-Министрінің орынбасары – Қаржы министрі Ерұлан Жамаубаевтың, Алматы қаласының әкімі Ерболат Досаевтың, «Бәйтерек» ҰБХ» АҚ басқарма төрағасы Қанат Шарлапаевтың, «Даму» кәсіпкерлікті дамыту қоры» АҚ басқарма төрайымы Гаухар Бурибаеваның, Қазақстан Республикасы Парламенті Мәжілісі депутаттарының, банк төрағалары мен кәсіпкерлердің қатысуымен өтеді.
Көрмеде оңтүстік астана тұрғындары мен қонақтарына азық-түлік, құрылыс, жиһаз және тоқыма өнеркәсібі, ауыл шаруашылығы, мамандандырылған техника мен құрал-жабдықтар, кәдесыйлар мен полиграфиялық өнімдерді көрсететін 320-ға жуық компания өз өнімдерін ұсынады. Көрмеде «Халық Таңдауы» тәуелсіз дәм тату байқауы және жетекші қазақстандық өндірушілер ұсынған әйелдер мен ерлер киімдері топтамаларының көрсетілімі өтеді. Сонымен қатар көрме қатысушыларының билеттері арқылы күнделікті ұтыс ойындары болады.