Үкімет ең төменгі жалақыны анықтау әдістемесін жаңартуды жоспарлап отыр.
Бұл туралы Премьер-министрдің орынбасары – Ұлттық экономика министрі Серік Жұманғарин Сенат отырысынан кейінгі брифингте айтты, - деп хабарлайды aqshamnews.kz.
Министрдің сөзінше, қазір ең төменгі жалақыны есептеуде орташа және медиандық еңбекақы көрсеткіштері қолданылып жүр. Алайда олардың қайсысын негізге алу керектігі әлі нақты айқындалмаған.
"Ең төменгі жалақының медиандық еңбекақының 45–50 пайызына тең болуы керек деген пікірлер бар. Сондықтан әдістеменің бар талаптарын біріздендіріп, нақты анықтап алу қажет", - деді Жұманғарин.
Ол жаңа тәсілді енгізу фискалдық шоғырландыруды қажет ететінін атап өтті.
"Бюджет кірісін арттырып, тиімсіз шығыстарды қысқарту керек. Премьер-министр бүгін осы бағыттағы жоспарларды түсіндірді. 2026 жылдың алғашқы жарты жылдығында салық және бюджет реформаларының нәтижесін көретін боламыз. Сол кезде 2027–2029 жылдарға арналған бюджет ұсынылады. Ең төменгі жалақы мәселесі де сол кезеңде қаралады", - деді министр.