Түркістан облысында 12 адам, оның ішінде 9 бала қаза тапты. Бала құқықтары жөніндегі уәкіл Динара Зәкиева болған жағдайдың егжей-тегжейін бөлісті, - деп хабарлайды aqshamnews.kz тілшісі.
Өңірлік уәкіл Психологиялық қолдау орталығының мамандарымен бірге оқиға орнына барды.
"Үйде екі отбасы болды - ата-аналар мен балалар. Өрт шығып, шатыр опырылып түсті", – деп жазды Зәкиева Instagram-дағы сторисінде.
Облыстық полиция департаментінде "Өрт қауіпсіздігі талаптарын бұзу" бабы бойынша қылмыстық іс қозғалды.
Оқиғаның мән-жайы
Түркістан облысы Төтенше жағдайлар департаментінің мәліметінше, 18 қарашада таңертең Жетісай ауданына қарасты Алғабас ауылындағы екі қабатты жеке тұрғын үйден өрт шыққаны туралы хабар түскен.
Оқиға орнына жеткен өртсөндірушілер келген сәтте үй толықтай өртке оранғаны анықталған. Өртті сөндіру және барлау кезінде үйден ес-түссіз жатқан үш адам эвакуацияланып, жедел жәрдем бригадасына тапсырылды.
"Үйдің ішінен 12 адамның мәйіті табылды, олардың тоғызы – бала", – делінген ТЖД хабарламасында.
Көршілердің айтуынша, оқиға болған үйде қонақтар болған, себебі алдыңғы күні үй иелерінде іс-шара өткен. Өрт 360 шаршы метр аумақта толық сөндірілді.
Қазір оқиға орнында барлық жедел қызмет жұмыс істеп жатыр. Өрттің шығу себебі анықталып жатыр, тергеу басталды.
Үкімет пен Түркістан облысының әкіміне зардап шеккен азаматтардың туған-туыстарына барлық қажетті көмек көрсетіп, қайғылы оқиғаны жан-жақты тексеруді тапсырды.