Мәдениет және ақпарат министрлігі мен «Азаматтық бастамаларды қолдау орталығы» КЕАҚ қолдауымен «ҮЕҰ Академиясы» жобасы аясында Алматыда «Ақпараттық ресурстық орталық» қоғамдық қорының базасында ҮЕҰ белсенді өкілдеріне арналған «жоғары» деңгейдегі қосымша курс өтті. Бұл курс жетекші қазақстандық және шетелдік сарапшылардың шеберлік сабақтарын қамтыды, деп хабарлайды aqshamnews.kz
Жеті күн бойы Қазақстанның 100-ден астам коммерциялық емес ұйымдарының өкілдері тренингтерге қатысты. Қатысушылар арасында аймақтық гранттық байқаулардың жеңімпаздары мен алғашқы жобалық өтінімдерін әзірлеуге дайындалып жатқан жаңа ҮЕҰ-дар болды.
Қорытынды шеберлік сабақтарын шетелдік тренерлер өткізді: Лола Абдусалямова – ұйымдастырушылық және институционалдық даму жөніндегі кеңесші, Еуразия қоры, Орталық Азиядағы азаматтық қоғамды қолдау жөніндегі USAID бағдарламасының өкілі, және Дамира Тоқтасынова – сарапшы, ЮНФПА тренері. Олар қатысушыларға әлеуметтік дизайн бойынша әдістемелік ұсыныстар берді. ҮЕҰ өкілдері жобалық өтінімдерді бағалау, әлеуметтік жобаларды әзірлеу мен жүзеге асыру туралы онлайн және офлайн режимінде кеңестер алып, сұрақтарына жауап алды.
«Әлеуметтік дизайн нені қамтиды?» деген сұраққа Шымкент ресурстық орталығының жетекшісі, қазақстандық тренер Сара Имбарова жауап берді:
-Қоғамның қатысуы! Әлеуметтік дизайн жергілікті тұрғындарды жобаларды әзірлеу мен жүзеге асыруға тартуды қамтиды. Бұл азаматтық белсенділікті арттырып, қоғамның бірлігіне ықпал етеді.
«ҮЕҰ Академиясы» жобасы қоғам белсенділеріне кедейлік, жұмыссыздық, білім мен денсаулық сақтау салаларындағы мәселелерді анықтап, шешуге көмектесетін жаңа білім береді. Сонымен қатар, жобалар ұзақ мерзімді, тұрақты шешімдер ұсынуы тиіс.
Курс соңында «ҮЕҰ Академиясы» жобасының жетекші үйлестірушісі Светлана Пак тренингке қатысушыларға алдағы жарыстарда сәттілік тілеп, белсенді қатысушыларды сертификаттармен марапаттады. Ол ҮЕҰ-ларға арналған бұл білім беру курсының маңыздылығын атап өтіп, «Азаматтық бастамаларды қолдау орталығына» ҮЕҰ-ларға өз әлеуетін нығайтуға мүмкіндік бергені үшін алғыс білдірді.