Қазақстандық танымал әзілкеш Тұрсынбек Қабатов ұсақ бұзақылық жасағаны үшін әкімшілік жауапқа тартылды, деп хабарлайды almaty-akshamy.kz.
Астана қаласының әкімшілік құқық бұзушылықтар жөніндегі мамандандырылған ауданаралық сотының қаулысына сәйкес, Тұрсынбек Қабатов ӘҚБтК-нің 434-бабының 1-бөлігі бойынша айыпты деп танылды.
Іс материалдарына сәйкес, Қабатов ұшақ бортында мас күйінде әдепсіз сөздер айтқан. Сотта Қабатов өзінің стюардессалардың нашар қызметіне көңілі толмағанын айтып, оларға өз ескертуін білдіргені анықталды. Ол өзінің әдепсіз сөз айтқаны немесе айтпағаны есінде жоқтығын айтқанымен, қоғамдық тәртіпті бұзғаны үшін кешірім сұраған.
Куәгер, яғни аға стюардесса, Қабатовтың ұшақ бортында мас күйінде болғанын және әдепсіз сөздер айтып, сол арқылы қоғамдық тәртіп пен азаматтардың тыныштығын бұзғанын растады. Құқық бұзушының кінәсі куәнің айғақтарымен, жолаушыны полицияға беру актісімен, бейнежазбамен және медициналық сараптама қорытындысымен расталды.
ӘҚБтК-нің 434-бабының 1-бөлігінің санкциясы бойынша 20 АЕК көлемінде айыппұл салу немесе 5-тен 15 тәулікке дейін әкімшілік қамаққа алу көзделген. Сот жасалған іс-әрекеттің көлемі мен сипатын, қоғамға теріс әсер ететін және қоғамды сыйламаушылықты көрсетуге бағытталған, лайықсыз мінез-құлықтың жалғасуын ескере отырып, Тұрсынбек Қабатовты 5 тәулікке қамауға алу жазасын тағайындады.
Қаулы заңды күшіне енген жоқ, сондықтан айыпталушының оны апелляцияға беру мүмкіндігі бар.