Түркістанда жол ережесін бұзғаны үшін салынған айыппұлдарға наразы болған екі тұрғын бейнебақылау камераларын қасақана бүлдіріп, қылмыстық жауапкершілікке тартылды, деп хабарлайды Aqshamnews.kz тілшісі.
Оқиға қала көшелерінің бірінде түнгі сағат 01:00 шамасында болған. Белгісіз екі адам төрт бірдей бейнебақылау камерасын істен шығарып, мемлекетке 700 мың теңгеден астам шығын келтірген.
Полиция мәліметінше, күдіктілер қылмысқа алдын ала дайындалып, бетперде киген. Олар ұзын таяқпен камераларды ұрып сындырған. Жедел-іздестіру шаралары барысында тәртіп сақшылары көршілес камералардың жазбасын қарап, олардың жүрген бағытын анықтаған.
Ұсталған екі азамат та кінәсін толық мойындаған. Олардың сөзінше, бұл әрекетке жол ережесін бұзғаны үшін жиналып қалған ірі көлемдегі айыппұлдар себеп болған. Күдіктілер осылайша «кек алмақ» болғанын айтқан.
Қазір аталған дерек бойынша бөтеннің мүлкін қасақана жою немесе бүлдіру бабы бойынша қылмыстық іс қозғалып, сотқа дейінгі тергеу амалдары жүргізіліп жатыр.