Түркістан облысы Келес аудандық сотында дамуында ерекшелігі бар 24 жастағы жігітті зорлау ісіне қатысты үкім шықты, – деп хабарлайды Аqshamnews.kz тілшісі.
Оқиғаның мән-жайы
Бұл жағдай 2025 жылдың наурызында “НеМолчи.kz” қорының жазбасынан кейін белгілі болды. Қор дерегінше, ақыл-ой қабілеті 4 жастағы баланың деңгейіне сәйкес келетін 24 жастағы азамат бірнеше жыл бойы өз туыстары мен көршілерінен жәбір көріп келген.
Жәбірленушінің анасы зорлық-зомбылыққа алты адамның, соның ішінде кәмелетке толмағандардың да қатысы бар екенін айтқан. Алайда сот алдында оның кәмелетке толған үш туысы ғана жауапқа тартылды.
Сот шешімі
Сот процесі жабық түрде өтті. Екі айыпталушы Қылмыстық кодекстің 121-бабы 2-бөлігінің 1 және 4-тармақтары бойынша — яғни бірнеше рет жасалған топтық зорлау фактісі үшін кінәлі деп танылды. Үшінші айыпталушы осы баппен қатар ұрлық жасағаны үшін де жауап берді (ҚК 188-бабы).
Жәбірленушінің адвокаты Гүлайхан Тұрсыманованың айтуынша, сот үшеуін де тоғыз жылға бас бостандығынан айыру туралы үкім шығарған.