Түркістан облысында Қырғызстаннан темекі өнімдерін заңсыз тасымалдаумен айналысқан топтың қызметі тоқтатылды, деп хабарлайды Aqshamnews.kz Бас прокуратураның баспасөз қызметіне сілтеме жасап.
Ведомствоның мәліметінше, прокуратураның бастамасымен жүргізілген жедел іс-шаралар барысында күдіктілердің Қырғыз Республикасынан темекі өнімдерін контрабандалық жолмен әкеліп, оны Түркістан облысы мен еліміздің батыс өңірлерінде сатқаны анықталған. Тексеру кезінде жалпы құны 103 млн теңгенің темекі өнімдері тәркіленді. Аталған дерек бойынша ҚР Қылмыстық кодексінің 214-бабы бойынша сотқа дейінгі тергеу жүргізіліп жатыр.
Бұдан бөлек, облыста жалған кәсіпорындар арқылы шамамен 200 млрд теңгенің шетелге заңсыз шығарылғаны анықталды. Бұл факті бойынша ҚР Қылмыстық кодексінің 235-1-бабы 3-бөлігі («Валюталық құндылықтарды Қазақстан Республикасынан заңсыз әкету, жөнелту немесе аудару») бойынша сотқа дейінгі тергеу басталды. Тергеу мүддесіне байланысты өзге мәліметтер жарияланбайды.
Сондай-ақ прокуратура шекара маңында жүк көліктерінің жүргізушілерінен ақша бопсалаумен айналысқан қылмыстық топтың әшкереленгенін хабарлады. Тергеу барысында заңсыз делдалдық қызметтен түскен қаржының бір бөлігі мемлекеттік орган қызметкерлеріне пара ретінде берілгені анықталған.
Қазіргі таңда бұл іс бойынша ҚР Қылмыстық кодексінің 366 және 367-баптары бойынша сотқа дейінгі тергеу жүргізілуде. Қылмыстық схемаға қатысы бар 23 адам анықталып, олардың бесеуі қамауға алынды.