Түркістан облысының Арыс ауданында агроөнеркәсіп саласында аса ірі көлемде бюджет қаражатын жымқыру дерегі анықталды, деп хабарлайды Aqshamnews.kz тілшісі.
Арыс ауданында ауыл шаруашылығын дамытуға бөлінген мемлекеттік субсидияларды заңсыз алу фактісі прокурорлық тексеру барысында белгілі болды. Бұл туралы өңір прокуратурасы мәлім етті.
Тергеу мәліметінше, 2021 жылдың сәуір айында «Ы» ауыл шаруашылығы өндірістік кооперативінің төрайымы ақпараттық жүйеге жалған мәлімет енгізуді ұйымдастырған. Құжаттарда кооперативтің жалға алғаны туралы жалған деректер көрсетілген.
Атап айтқанда, жүйеге:
2 470 бас аналық ірі қара;
селекциялық жұмыс жүргізуге арналған 120 асыл тұқымды бұқа жалға алынғаны туралы мәлімет енгізілген.
Осы ақпараттың негізінде кооперативтің есепшотына мемлекеттен 24,7 млн теңге көлемінде субсидия аударылған.
Алайда тексеру кезінде шын мәнінде селекциялық жұмыс тек 18 асыл тұқымды бұқа мен 450 бас аналық малға ғана жүргізілгені анықталды.
Осылайша, заңсыз алынған субсидия көлемі 20,2 млн теңгені құраған.
Аталған факті бойынша прокуратура Қылмыстық кодекстің 190-бабы 4-бөлігі 2-тармағы бойынша, яғни аса ірі көлемдегі алаяқтық дерегімен сотқа дейінгі тергеп-тексеруді бастаған.
2026 жылғы 20 ақпандағы сот үкімімен кооператив төрайымы кінәлі деп танылды. Сот оған 4 жыл бас бостандығынан айыру жазасын тағайындады. Сонымен қатар 5 жыл мерзімге коммерциялық ұйымдарда басшылық қызмет атқару құқығынан айырды.
Заңсыз алынған 20,2 млн теңге бюджет қаражаты толық көлемде өндіріліп, мемлекет кірісіне қайтарылды.
Айта кетейік, сот үкімі әзірге заңды күшіне енген жоқ.