ЮНЕСКО тарапынан жарияланған және жыл сайын маусымның бірінші жексенбісінде атап өтілетін Дүниежүзілік таңғы ас күні аясында Түркия Республикасының Алматыдағы Бас консулдығы Түрік асханасы апталығын ұйымдастырып, бірнеше маңызды іс-шара өткізді.
Қазақстан Республикасының Сыртқы істер министрлігінің Алматы қаласындағы Өкілдігі мен құрметті консулдықтардың қолдауымен, сондай-ақ Intercontinental қонақ үйімен бірлесіп түрік дастарханын жайды. Атап айтқанда, классикалық түрік тағамдарынан тұратын салтанатты кешкі асқа дипломатиялық корпус өкілдері қатысты.
Сонымен қатар, Бас консулдық резиденциясында өткен арнайы таңғы ас барысында Алматыдағы жетекші ғалымдар, ғылыми ұйымдар мен, БАҚ өкілдері және сараптамалық орталықтардың мамандары Түрік таңғы асынан дәм татып, бай мәдениетімен танысты.
Түркияның Алматыдағы Бас консулы Еврен Мүдеррісоғлы өз сөзінде түрік халқының таңғы ас дәстүрінің ерекшелігіне тоқталды. Ол бұл мерекенің алғаш рет Түркияның Ван аймағында басталып, бүгінде әлемдік деңгейдегі мәдени іс-шараға айналғанын атап өтті. Бас консулдың айтуынша, түрік таңғы асы – тек тамақтану рәсімі ғана емес, отбасылар мен достарды ғана емес, жалпы адамдарды біріктіретін, қоғамның тұтастығын білдіретін маңызды дәстүр.
Бұл іс-шаралар Түрік таңғы ас мәдениетінің жаһандық танымалдығын арттыруға, сондай-ақ Қазақстан мен Түркия арасындағы мәдени-дипломатиялық байланыстарды нығайтуға бағытталған.