Бұл туралы Түркия Президенті Режеп Тайып Ердоған мәлімдеді.
Түркияның оңтүстігіндегі орман өртіне қатысты күдікті ұсталды. Алапат өртке «Күрдістанның жұмысшылар партиясының» қатысы да болуы мүмкін. Бұл туралы Түркия Президенті Режеп Тайып Ердоған мәлімдеді, деп хабарлайды Almaty-akshamy.kz Almaty.tv сайтына сілтеме жасап.
«Миластағы өртке байланысты бір адам ұсталды. Осыған дейін айтып келгенімдей, террорлық ұйым басшыларының ормандарды өртеу туралы тапсырмаларынан кейін қызыл жалын шарпыған алқаптардың аумағы 2 есеге артып кетті. Алдында болған өрттің кейбірі дәл осындай бұйрықпен жасалған болуы мүмкін. Сондықтан біз кінәлілерді мейлінше тезірек анықтап, тиісті жазасын беруіміз қажет»,– деді Түркия Президенті Pежеп Тайып Ердоған.
Естеріңізге сала кетейік, шілденің 28-сінде Анталияның Манавгат ауданында өрт шығып, кейін ол басқа аудандарға тарап кеткен еді. Осыған байланысты өрттен зардап шеккен өңірлер апат аймағы деп жарияланды. Бүгінге дейін өрт ошақтарының басым бөлігі сөндірілді.