Жексенбі күні АҚШ президенттігіне үміткер Дональд Трамп McDonald’s мейрамханасына жұмыс істеуге барды, деп хабарлайды aqshamnews.kz
Трамптың мақсаты қарсыласы Камала Харриске тиісу болатын. Харрис штабының мәліметінше, Камала 1983 жылдың жазында Калифорния штатындағы Аламеда қаласындағы McDonald’s мейрамханасында жұмыс істеген. Сол кезде Харрис Говард университетінің студенті болып, кассир қызметін атқарған, фри картобын және балмұздақ сатқан.
Трамп осы жұмыс жайлы пікірін айтып өтті: «Камала Харристің McDonald’s-тағы жұмысын маңызды тәжірибе деп көрсетуі күлкілі. Бірақ бұл жұмыс қаншалықты қиын болды? Ол фри картобын дайындап, оны қуыру қиын дейді», – деп, Трамп Пенсильвания штатындағы Фистервиллдегі McDonald’s мейрамханасында мәлімдеді.
Фартук пен қызыл галстук таққан Трамп, жексенбі күні McDonald’s-та кассада жұмыс істей отырып, қарсыласына қыжыртпа сөздер айтумен болды.
Бұл жағдай Пенсильвания штатындағы Feasterville-Trevose қаласындағы тез тамақтану мейрамханасына үлкен топты жинады.