Қазақстанда "Назар аударыңыз, балалар!" жедел-профилактикалық іс-шарасы басталды, деп хабарлайды aqshamnews.kz Polisia.kz-ке сілтеме жасап.
Бүгінгі таңда елдегі кәмелетке толмағандардың қатысуымен болатын жол апаты оқиғалары тәртіп сақшыларын ерекше алаңдатып отыр. Жыл сайын жол-көлік оқиғасының салдарынан 300-ден астам бала қаза тауып, төрт мыңнан астамы түрлі жарақат алады. Бұл қоғам үшін елдің демографиялық резервіне нұқсан келтіретін орны толмас шығын.
"Осы жылдың алғашқы төрт айында республика аумағында балалардың қатысуымен екі мыңнан астам апат тіркелді. Салдарынан 67 бала қаза тауып, үш мыңға жуығы жарақат алды", - дейді полицейлер.
Полиция алдағы жазғы демалысты ескере отырып, жол қауіпсіздігі мәселелерінде белсенділік пен жауапкершілік танытуға шақырады.
"Біз балалардың қатысуымен болатын жол апатының алдын алуға бағытталған бірлескен жұмыс жүргізу үшін барлық ресурсты пайдалануымыз қажет. Осыған байланысты елімізде "Назар аударыңыз, балалар!" акциясы өткізіледі. Бұл акция балалардың жолдағы қауіпсіздігіне қоғамның назарын аударуға бағытталған", - делінген хабарламада.