Алматы полициясы әйгілі "Нұр-Мұқасан" тобының бұрынғы және қазіргі солистеріне қатысты жанжалға пікір білдірді, деп хабарлайды Аqshamnews.kz тілшісі.
Бұған дейін әлеуметтік желіде топтың қазіргі солисі Ғалымжан Сүлейменді бұрынғы қатысушы Мұқасан Шахзадаев пен оның таныстары ұрып-соққаны туралы ақпарат тараған. Зардап шегушінің айтуынша, оқиға 20 қарашада болған. Жанжал топтың әндерін рұқсатсыз орындау дауына байланысты туындаған.
Полиция мәліметінше, 22 қарашада Наурызбай ауданының полиция басқармасына тұрғыннан азамат М. және өзге де адамдар тарапынан дене жарақатын салу бойынша шағым түскен. Аталған факті бойынша қылмыстық іс қозғалды. Қазіргі таңда барлық мән-жай анықталып, жан-жақты және объективті тергеу жүргізіліп жатыр. Тергеу қорытындысы бойынша заңға сәйкес шаралар қабылданады.