Балалар телефонға "телміріп" отырады, себебі оларға жағымды әсер мен эмоциялар жетіспейді. Бұл туралы психолог Александра Фокина айтты, - деп хабарлайды Aqshamnews.kz тілшісі "Лента.ру" басылымына сілтеме жасап.
Психологтың айтуынша, егер бала телефонға тәуелді бола бастаса, онда бірнеше қарапайым әдісті қолдану керек. Ең алдымен, баланың гаджетсіз айналысып жатқан әрбір ісін байқап, сол үшін мақтап отыру керек. Мысалы, оның шығармашылығына таңғалуды, жылы сөзді аямай айту керек.
"Мәселен, "Суретті қалай әдемі етіп саласың?" "Мен мұнда тұтас бір ойыншық сарбаз армиясын көріп тұрмын", – деп бірнеше мысал келтірді психолог.
Фокинаның сөзінше, балалар көбіне гаджеттерге ата-аналарына ыңғайлы болғандықтан да "байланып" қалады.
Сарапшы ата-аналарға ой салды.
"Сіз балаға уақыт пен күш жұмсауға шама жоқ кезде әр жолы гаджет немесе мультикпен "құтылып" жүрген шығарсыз? Соны ойлап көріңіз" – деп ескертті сарапшы.
Мұндай жағдайда ол алдымен ата-аналар өз мінез-құлқын өзгертуі керегін, ол өзгеріс балаларға да оң әсер ететінін атап өтті.
Сарапшы ата-аналарға балаға жағымды эмоциялар сыйлауды – онымен ойнауды, бірге жаңа көңіл көтеру түрлерін ойлап табуды ұсынды.
Сондай-ақ маман ата-анасы үйде жоқ кезде балаларды телефоннан алаңдатудың ерекше тәсілін атады. Ол оларға өтініш пен тілектер жазылған шағын хаттар қалдыруға кеңес берді.
"Мысалы: "Сүйікті балаларым! Сендерден планшеттегі ойынды ұнатқаннан да қызығырақ бес іс ойлап тауып, соны суреттеп салуларыңды сұраймын. Сендерді жақсы көремін" деген секілді хаттар жолдауға болады, – деп қорытындылады Фокина.