Қазақстан Республикасы Президенті жанындағы Ұлттық құрылтай мүшесі, ҚР Парламенті Мәжілісінің VI шақырылым депутаты Шаймардан Нұрымов:
– Бұл күн әрбір қазақстандықтың өмірінде ерекше маңызға ие. Ол біздің егемен еліміздің қуатты, дербес және тәуелсіз мемлекет ретінде жеткен табыстарының символына айналды. Қазақстанның халықаралық аренадағы беделі артып, пікіріне құлақ асатын елге айналғанын көрсетеді.
Тәуелсіздік жылдарында біз өз Конституциямызды қабылдап, заңдарымызды бекіттік, тұрақты экономика құрдық. Көрші елдермен мемлекеттік шекарамызды делимитацияладық, қуатты әскер жасақтадық және әлемнің әртүрлі елдерімен табысты сауда қарым-қатынасын жолға қойдық. Елімізде 100-ден астам ұлт өкілі татулық пен ынтымақтастықта еңбек етіп, болашақ ұрпақтың игілігі үшін аянбай қызмет етуде.
Қазақстан БҰҰ-ның толыққанды мүшесі және көптеген халықаралық, аймақтық ұйымдарға белсенді қатысушы. Біз ядролық қарудан бас тартып, бүкіл әлемге бейбітсүйгіштік пен көрші елдермен достық қарым-қатынас орнату үлгісін көрсеттік. Бұл тек көрші мемлекеттермен ғана емес, сонымен қатар бүкіл өркениетті әлеммен үйлесімді байланыстар құруға негіз болды.
Әрбір қазақстандық үшін бұл мереке – еліміздің қол жеткізген табыстары үшін мақтаныш және Қазақстанның жарқын болашағы үшін аянбай еңбек етуге деген ниеттің мерекесі.
Барша отандастарымды шын жүректен құттықтаймын! Біздің ортақ үйіміз – Қазақстанымыз гүлдене берсін!